Í þessari viku verða fundir með foreldrum þar sem starfið í vetur verður kynnt, bekkjarfulltrúar valdir í hverjum bekk o.fl. Þetta er líka kjörinn vettvangur fyrir foreldra að ræða sameiginleg málefni, s.s. samstöðu um útivistartíma, foreldrarölt, forvarnir og fleiri mál. Á meðan foreldrar funda í salnum mæta nemendur í tíma skv. stundaskrá, nema 8.-10. bekkur sem situr kynningarfundinn með foreldrum.

Kynningarfundirnir verða dagana 1.-3. september og eru allir á sama tíma: kl. 8:15-9:15. Foreldrar mæta í sal skólans.

Allir nemendur skólans fóru í stutta gönguferð í morgun og gengu sem leið lá í gegnum nýju undirgöngin og þaðan eftir malarveginum í átt að Sjávarhólum. Lengra var ekki farið að sinni og sneri hersingin við og hélt til baka í skólann. Þessi ganga var liður í því að brydda uppá öðru vísi föstudagsskemmtunum eins og gert var sl. vor. Við nýtum góða veðrið þessa fyrstu daga og vikur skólaársins eins mikið til útiveru og hægt er og ætlum að fara í leiki, íþróttir og ýmislegt af því tagi þennan fyrsta tíma á föstudagsmorgnum sem merktur er "föstudagsskemmtun". Þegar líða tekur á haustið taka svo við skemmtanir á sal, s.s. leikrit, söngur og dans.

Fyrsti skóladagurinn á þessu hausti fór vel af stað og voru nemendur ánægðir að mæta aftur í skólann og nýnemar stóðu sig vel. Einn nemandi lýsti skólanum svona „það er svo gaman í skólanum að ég vildi að ég ætti heima hérna“